wiä dr rägätropfä zum ozean wird dr rägätropfä gheit vom himmel. är gheit userä wulchä. sofort foht är afo dänggä. i bi villi chlini teil, dänggt är. i chumm usem dunscht. flugzüg si dur mi durä gflogä. i ha d bärgä umhüllt. i bi ä teil gsi vo dr wulchä wo mi geborä het. partikel hei sich in mir vereint. i bi öppis grössers als dr chlinschti teil vo mir. das alles dänggt dr rägätropfe im gheiä. i gseh d sunnä dänggt är. gits ä rägabogä frogt är sich und bin i ä teil drvo? är dänggt viel dr rägätropfä. nit schnäll aber vill. mini spitzä isch do wo obä isch, mini trubä sitzt untä. i tropf ab dänggt är. das isch mini beschtimmig mis si. aber unter öis, das cha nit alles si. äs muess öppis grössers gä. är fliegt anerä anderä wulchä verbi. muetter, urfrucht. do chumm i her. bald wärdä mehr und mehr tropfä fallä. brüederä, schweschterä im geischt. i fall eifach dur alles durä dänggt dr rägätropfä. ich ha eifach diä kritischi grössi erreicht. das isch alles. i bi z‘schwer um dobä z blibe. im falle weiss i dass i bi. i bi villi chlini teil. öppis grössers fasst sich in mir zämmä. äs läbt, jä äs läbt. und im dängä fall i ins nüt. i gspür dr fall. dr wind isch ohrebetäubend. das jetzt muess gschwindigkeit si. wulchä zische verbi. i wird grösser dänggt är. i wird ä richtig fettä rägätropfä si bim ufprall. wieso weiss är das mit em ufprall. i weiss es nit aber i glaubs dänggt dr rägätropfä. aber wohär chunnt das was i glaub aber nit weiss. i dängg also fall i dänggt är bi sich. i fall also weiss i do bin i mir sicher. i glaub will i us dä wulchä geborä wordä bi und i mir ä seel vo dr witi wohnt isch in mir dr glaubä stark und mächtig. i glaub, dass i fall. i cha glaube und dänggä was i will. i bi frei i minä überzügigä. alli teil fiägä sich zu öppis grösserem. zu mir. i bi. i bi us villnä teil geborä wordä, us gischt, us näbel und us dunscht. i bis gröschtä wo dir euch chönnet dänggä. alles wirkt i mir. i gschpür jedä chlinschtä teil. s gröschtä wo dir euch chönnet dänggä. nimm dr himmel, i bi dr ozean. i bi so vill dänggt dr rägätropfä. i bi alles. i bi s gröschtä wäsä. us mir chunnt alles zu mir fliässt alles zrugg. i setz d zit i gib d zeiche. i nimm dir öppis äwäg und gibs dir spöter wieder. dr rägätropfä sunnt sich i sim nöie bewusstsi ä ozean z si. i bi alles dänggt är. jedi muetter wo ihrä sohn hei wünscht. jedi ärbse wo will verschlungä si. jedä gfangenä fisch wo ins meer zrugg will. in mi dänggt dr rägätropfä chehrt alles zrugg. i gspür plötzlich ä chraft diä nid us mir z cho schiint. ä zueversicht und ä wiiti. ä froid und ä usserwählt si. alles woni kenn verblasst. alles was i mein verwälkt. alles wo nid unabdingbar vo derä wält isch vergoht. dr rägätropfä fallt und fallt. är tritt jetzt us dä wulchä. unter ihm isch alles blau. sowit s aug cha gseh. das muess s meer si dänggt sich dr rägätropfä wo au än ozean isch. i wird im meer ufgoh. i wird ä wällä si, tosend ans ufer krachä und mi lislig zruggziäh. i wird gischt si zämmä mit trillionä anderä rägätropfä. i wird schiff umspiählä und erneut ufstigä um i dä wulchä geborä z wärdä. dr rägätropfä gheit schnäll. mit circa sächs meter pro sekundä. das isch sehr schnäll. s tempo und dr luftwiderstand benäble sini sinn. i chumm usem wiss über mir und i gang ins tiefblau unter mir dänggt sich dr rägätropfä. i gang vo obä nach untä. aber äs git au ä links und ä rächts und ä vornä und hintä. alles bewegt sich ums zentrum dänggt dr rägätropfä wo au än ozean isch. vornä und hintä si d zit. obä und untä si mini gmiätsverfassig, und links und rächts weiss i au nit. dr rägätropfä chunnt dr meeresoberflächi immer nöcher. wieso dänggt är nid no öppis wichtigs. i bi nä rägätropfe wo dänggt är sig dr ozean. äs isch so schön öppis grössers z si als eim sälber. alles schint z stimmä. i cha dänggä was i will und i wird immer schnäller und schnäller bis i due verschwindä. dr rägätropfä cha jetzt d wällä erkenne. nümmä lang, nümmä lang. är het dr idruck als würd är immer schnäller will är schwerer wird. aber das tüscht.“ i bi dr ozean wo wird im meer ufgoh. i cha .......“ pflatsch.